இதயம் முரளி – விமர்சனம் ⭐⭐⭐⭐

ஆகாஷ் பாஸ்கரன் இயக்கத்தில், அதர்வா, ப்ரீத்தி முகுந்தன், கயாடு லோஹர், நாட்டி, தமன் எஸ், நிஹாரிகா, ரக்ஷன், திராவிட், ஏஞ்சலின், அஞ்சு குரியன், சுதாகர், யஷஸ்ரீ, ஜோனிடா ஆதியோர் நடிப்பில் வெளிவந்துள்ள படம் இதயம் முரளி. 

தொழில்நுட்பக்  களைஞர்கள்

இயக்குனர் : ஆகாஷ் பாஸ்கரன் 

இசை : தமன் எஸ்

 ஒளிப்பதிவு : மனோஜ் பரமஹம்சா, சிஎச் சாய் 

எடிட்டர் : பிரதீப் இ ராகவ்

மக்கள் தொடர்பு : சுரேஷ் சந்திரா, சதீஷ் (AIM)  

90-களில் வளர்ந்த பல இளைஞர்களின் மனநிலையை மையமாக வைத்து உருவாக்கப்பட்டிருக்கும் படம் இதயம் முரளி. காதல் இருந்தும் அதை வெளிப்படுத்த முடியாமல், ஒவ்வொரு முறையும் தயக்கத்தால் வாய்ப்புகளை இழக்கும் ஒரு இளைஞனின் வாழ்க்கைப் பயணமே இந்தப் படத்தின் கரு. காலம் மாறினாலும் சில உணர்வுகள் மாறுவதில்லை என்பதை மென்மையாகச் சொல்ல முயற்சிக்கிறது.

அதர்வா தனது கதாபாத்திரத்தில் மிகவும் இயல்பாக பொருந்தியிருக்கிறார். வெட்கம், குழப்பம், ஏக்கம், ஏமாற்றம் என ஒவ்வொரு உணர்வையும் அளவாக வெளிப்படுத்தி கதையை சுமந்து செல்கிறார். குறிப்பாக அவரது தந்தை முரளியை நினைவூட்டும் தருணங்கள் ரசிகர்களுக்கு இனிய நினைவுகளை ஏற்படுத்துகின்றன.

ப்ரீத்தி முகுந்தன் திரையில் தோன்றும் ஒவ்வொரு காட்சியிலும் தனது அழகாலும், இயல்பான நடிப்பாலும் கவனம் ஈர்க்கிறார். கயாடு லோஹர் குறைந்த நேரத்தில் மனதில் பதியும் நடிப்பை வழங்கியுள்ளார். நட்டி பொறுப்பான உறவினராக தனது அனுபவமான நடிப்பால் படத்திற்கு வலு சேர்க்கிறார். மற்ற நடிகர்களும் தங்களுக்கு வழங்கப்பட்ட கதாபாத்திரங்களை சிறப்பாக கையாண்டுள்ளனர். சிறப்பு தோற்றத்தில் வரும் பகத் பாசில் ரசிகர்களுக்கு மகிழ்ச்சியான ஆச்சரியத்தை தருகிறார். Fahadh Faasil

இசையில் தமன் உணர்வுகளை அழுத்தமாகக் கொண்டு செல்கிறார். பாடல்களும் பின்னணி இசையும் காட்சிகளுடன் ஒன்றிப்போகின்றன. ஒளிப்பதிவில் காதல், நினைவுகள், ஏக்கம் ஆகிய உணர்வுகள் அழகாக பதிவு செய்யப்பட்டுள்ளன. காட்சிகளின் வண்ணத் தேர்வும், ஃப்ரேமிங்கும் படத்திற்கு தனி அழகை கொடுக்கின்றன.

இயக்குநர் ஆகாஷ் பாஸ்கரன் காதலை பிரம்மாண்டமாக அல்ல, அன்றாட வாழ்க்கையில் நடக்கும் சிறிய தருணங்கள் மூலம் சொல்ல முயற்சித்திருப்பது பாராட்டுக்குரியது. ஆனால், நாயகனின் தயக்கத்திற்கான பின்னணி இன்னும் ஆழமாக சொல்லப்பட்டிருந்தால் கதாபாத்திரத்துடன் பார்வையாளர்கள் அதிகமாக ஒன்றியிருப்பார்கள். அதேபோல், இரண்டாம் பாதையில் திரைக்கதையை சற்று இறுக்கமாக அமைத்திருக்கலாம்.

மொத்தத்தில் பிரம்மாண்ட திருப்பங்களை எதிர்பார்க்காமல், மென்மையான காதல் கதைகளையும் 90-களின் நினைவுகளையும் ரசிப்பவர்களுக்கு இதயம் முரளி ஒரு நல்ல திரையரங்கு அனுபவத்தை வழங்கும். சில குறைகள் இருந்தாலும், மனதில் நிற்கும் தருணங்களுக்காக இந்தப் படத்தை கண்டிப்பாக பார்க்கலாம்.

VTV24x7 Rating: 4/5 ⭐⭐⭐⭐