திரைப்பட துறைக்கு விதிக்கப்பட்டுள்ள கேளிக்கை வரியை ரத்து செய்யுமாறு விஷால் உள்ளிட்ட திரைப்படத்துறையினர் தலைமை செயலகத்தில் அமைச்சர்களை சந்தித்து பேசியுள்ளனர். இதைத் தொடர்ந்து செய்தியாளர்களை சந்தித்த விஷால் கூறுகையில்,
“செய்தித்துறை அமைச்சர் கடம்பூர் ராஜூ, உள்ளாட்சித் துறை அமைச்சர் எஸ்.பி.வேலுமணி ஆகியோரை சந்தித்து பேசினோம். திரைப்படத் துறைக்கு விதிக்கப்பட்டுள்ள கேளிக்கை வரியை ரத்து செய்யுமாறு அமைச்சர்களிடம் கோரிக்கை வைத்துள்ளோம். இந்த கோரிக்கை தொடர்பாக தமிழக முதலமைச்சர் இன்னும் ஓரிரு நாட்களில் நல்ல முடிவு எடுப்பார் என்று நம்புகிறோம். கேளிக்கை வரி ரத்து செய்யப்படும் வரை புதிய படங்கள் வெளியாகாது” என்று உறுதிபட சொன்னார் விஷால். வரும் 18ஆம் தேதி தீபாவளியை முன்னிட்டு கொடிவீரன், அறம், மெர்சல் ஆகிய படங்கள் வெளியாக இருக்கிறது. இந்த நிலையில், புதிய படங்கள் வெளியாவதில் ஏற்பட்டுள்ள சிக்கல் நீக்கப்படுமா? என்பது கேள்விக்குறியாகவே உள்ளது
