பாக்கியராஜ் பாணியிலான குடும்பக் கதையுடன்… விரசமில்லாமல் சொல்லப்பட்ட ஒரு சுவாரஸ்யமான படம்!
நீண்ட இடைவெளிக்குப் பிறகு, நகைச்சுவையுடன் குடும்ப உறவுகளையும் சமூகக் கருத்துகளையும் கலந்து சொல்லும் பழைய பாணி திரைப்பட அனுபவத்தைத் தருகிறது ‘மொத ராத்திரி’.
துபாயிலிருந்து சொந்த ஊருக்கு வரும் ரிஷிகாந்துக்கு, குடும்பத்தினர் ஒரு பெண்ணைப் பார்த்து திருமணம் செய்து வைக்க முடிவு செய்கிறார்கள். ஆனால் அவருக்கு திருமணத்தில் விருப்பமில்லை. மறுபுறம், மணப்பெண்ணான அனிஷ்மா அனில்குமாருக்கும் திருமணத்தில் சம்மதம் இல்லை.
அதிலும், திருமணம் முடிந்தவுடன் தனது காதலனுடன் தப்பிச் செல்ல அனிஷ்மா திட்டமிடுகிறார். ஆனால் அவரது காதலன் எதிர்பார்த்ததற்கு முற்றிலும் மாறான குணாதிசயத்தைக் கொண்டவர் என்பது கதையில் சுவாரஸ்யத்தை ஏற்படுத்துகிறது.
இப்படி பல குழப்பங்களுக்கு நடுவில் அந்த இரவு என்ன நடக்கிறது என்பதுதான் படத்தின் மீதிக்கதை.
ரிஷிகாந்த் தனது கதாபாத்திரத்திற்கேற்ற இயல்பான நடிப்பை வழங்கியிருக்கிறார். குறிப்பாக, கதையின் சூழலுக்குள் தன்னை முழுமையாகப் பொருத்திக்கொண்டிருப்பது கவனிக்க வைக்கிறது.
படத்தின் முக்கிய பலமாக இருப்பவர் நாயகி அனிஷ்மா அனில்குமார். பல காட்சிகளில் தனது நடிப்பால் படத்தைத் தாங்கிச் செல்கிறார். உணர்ச்சிகள், நகைச்சுவை, பதற்றம் என ஒவ்வொரு சூழலுக்கும் ஏற்ற வகையில் சிறப்பாக நடித்துள்ளார்.
அப்துல் லீ, வெங்கடேஷ், பக்ஸ், சேத்தன் உள்ளிட்ட துணை நடிகர்களும் தங்களது கதாபாத்திரங்களை சிறப்பாக கையாண்டுள்ளனர். இயக்குநர் ராஜா கருப்பசாமியும் ஒரு முக்கிய கதாபாத்திரத்தில் தோன்றி, நடிப்பில் கவனம் ஈர்க்கிறார்.
பரத் சங்கரின் இசை, கதையின் மனநிலைக்கு ஏற்ப பயணிக்கிறது. பாடல்கள் கதையின் ஓட்டத்திற்கு பெரிய தடையாக இல்லாமல் ரசிக்க வைக்கின்றன.
ஒளிப்பதிவாளர் சுரேந்திரன் பரஞ்ஜோதியின் காட்சியமைப்புகள் படத்தின் கிராமியப் பின்னணியை அழகாகப் பதிவு செய்திருக்கின்றன. கதைக்களத்திற்கு ஏற்ற வகையில் இயல்பான ஃப்ரேமிங் அமைந்திருப்பது சிறப்பு.
தென்மாவட்டப் பின்னணியை மையமாக வைத்து கதை சொல்லியிருப்பது படத்திற்கு நம்பகத்தன்மையை கொடுக்கிறது.
‘மொத ராத்திரி’ என்ற தலைப்பு ஒரு குறிப்பிட்ட எதிர்பார்ப்பை உருவாக்கினாலும், அதனை வைத்து ஆபாசமாகவோ விரசமாகவோ செல்லாமல், குடும்பத்துடன் பார்க்கக்கூடிய வகையில் கதையை நகர்த்தியிருப்பது இயக்குநர் ராஜா கருப்பசாமியின் முக்கியமான பலம்.
அதுமட்டுமின்றி, கிராமப்புறங்களில் இன்னும் தொடரும் சாதிப் பாகுபாடு, வர்க்க வேறுபாடு போன்ற சமூகப் பிரச்சினைகளையும் கதையோட்டத்துடன் இணைத்து பேசியிருக்கிறார். கருத்தை திணிக்காமல், கதாபாத்திரங்களின் வழியாக இயல்பாகச் சொல்லியிருப்பது பாராட்டுக்குரியது.
மொத்தத்தில்…
காமெடி, குடும்ப உணர்வுகள், காதல், சமூகப் பார்வை என பல அம்சங்களை கலந்து, எளிமையான கதையை சுவாரஸ்யமாக சொல்ல முயன்றிருக்கிறது ‘மொத ராத்திரி’.
பெரிய அளவிலான மாஸ் மசாலா இல்லாமல், கதாபாத்திரங்களையும் சூழலையும் நம்பி பயணிக்கும் ஒரு குடும்ப பொழுதுபோக்கு திரைப்படம்.
விரசமில்லாமல்… விஷயத்தோடு சொல்லப்பட்டிருக்கும் ‘மொத ராத்திரி’யை குடும்பத்துடன் பார்க்கலாம்.
