குறைந்த பட்ஜெட்டில் ஒரு விசாரணை சார்ந்த திரில்லர் படத்தை உருவாக்க முயன்றிருக்கிறார் இயக்குநர் நெடுமாறன் மோகன் தாஸ்.
படம் தொடங்கிய சில நிமிடங்களிலேயே அடுத்தடுத்து இரண்டு கொலைகள் நடக்கின்றன. கொலைகளை செய்தது யார் என்ற கேள்வியுடன் போலீஸ் விசாரணை தொடங்கும் நிலையில், எதிர்பாராத திருப்பமாக கதாநாயகன் அசோக் காவல்துறையிடம் சரணடைந்து, அந்த இரண்டு கொலைகளையும் தான்தான் செய்ததாகக் கூறுகிறார்.
அப்படியானால் உண்மையிலேயே கொலைகளை செய்தது அசோக் தானா? அப்படி செய்திருந்தால் அதற்குப் பின்னால் இருக்கும் காரணம் என்ன? இல்லையென்றால் அவர் ஏன் குற்றத்தை ஏற்றுக்கொண்டார்? என்ற கேள்விகளுக்கான விடைகளை நோக்கி திரைக்கதை பயணிக்கிறது.
காதல், கோபம், விரக்தி என கதாபாத்திரத்தின் வெவ்வேறு உணர்வுகளை தனது நடிப்பில் வெளிப்படுத்தியிருக்கிறார் அசோக். குறிப்பாக கதையின் திருப்பங்களுக்கு ஏற்ப அவரது நடிப்பில் ஏற்படும் மாற்றங்கள் கவனம் பெறுகின்றன.
போலீஸ் அதிகாரியாக நடித்திருக்கும் திருமாறன் மோகன்தாஸ் இயல்பான நடிப்பை வழங்கியுள்ளார். அலட்டல் இல்லாத உடல்மொழியும், போலீஸ் அதிகாரிக்கான எதார்த்தமான தோற்றமும் கதாபாத்திரத்திற்கு பொருத்தமாக இருக்கிறது. அர்ஜுனா துரைசாமி, நிஷா இஸ்மாத், சங்கவி தர்மராஜ், Y.G. மகேந்திரன், அரவிந்த்ராஜ், கடலூர் சிவா உள்ளிட்ட மற்ற நடிகர்களும் தங்களுக்குக் கொடுக்கப்பட்ட கதாபாத்திரங்களை சிறப்பாக கையாண்டுள்ளனர்.
ஷேக் காதரின் இசை படத்தின் திரில்லர் தன்மையை கூட்டுகிறது. பின்னணி இசை விசாரணைக் காட்சிகளுக்கு தேவையான பதற்றத்தை உருவாக்குகிறது. பாடல்கள் இன்னும் சிறப்பாக அமைந்திருக்கலாம்.
வெங்கடாச்சலம் சிங்காரவேலனின் ஒளிப்பதிவு தேவையான அளவில் காட்சிகளை பதிவு செய்துள்ளது. அதேநேரத்தில், சில காட்சிகளில் காட்சியமைப்பிலும் DI கலரிங்கிலும் கூடுதல் கவனம் செலுத்தியிருந்தால் படத்தின் தொழில்நுட்பத் தரம் இன்னும் மேம்பட்டிருக்கும்.
இயக்குநர் நெடுமாறன் மோகன் தாஸின் முக்கியமான முயற்சி, படம் முழுவதும் ‘அடுத்து என்ன நடக்கும்?’ என்ற கேள்வியை பார்வையாளர்களிடம் தொடர்ந்து எழுப்புவதுதான். கதையின் அடிப்படை பாணி புதிதல்ல என்றாலும், அடுத்தடுத்த தகவல்களை படிப்படியாக வெளிப்படுத்தியிருக்கும் விதம் ஆர்வத்தை தக்க வைக்கிறது.
காட்சிப்படுத்தலில் சில இடங்களில் போதாமைகள் தெரிகின்றன. குறிப்பாக சில சம்பவங்கள் இன்னும் அழுத்தமாகவும் தெளிவாகவும் காட்சிப்படுத்தப்பட்டிருக்கலாம். கதையின் சில தருணங்களில் லாஜிக் குறித்த கேள்விகளும் எழுகின்றன.
ஆனால் விசாரணை எப்படித் தொடங்கியது என்பதில் இருந்து, ‘இது எப்படி சாத்தியம்?’ என்ற சந்தேகத்திற்கும், இறுதியில் ‘ஓ… இப்படித்தான் நடந்ததா?’ என்ற புரிதலுக்கும் பார்வையாளர்களை அழைத்துச் செல்கிறது திரைக்கதை.
பெரிய பட்ஜெட் இல்லாமலேயே ஒரு இன்வெஸ்டிகேஷன் திரில்லரை உருவாக்க வேண்டும் என்ற முயற்சி பாராட்டுக்குரியது. இன்னும் சற்று நேர்த்தியான காட்சிப்படுத்தலும், வலுவான திரைக்கதையும் இருந்திருந்தால் படம் வேறு ஒரு உயரத்தைத் தொட்டிருக்கலாம்.
மொத்தத்தில், ஏற்கெனவே பார்த்துப் பழகிய விசாரணை கதைக்களமாக இருந்தாலும், அதன் முடிவு வரை ஆர்வத்தைத் தக்கவைக்க முயற்சிக்கும் ஒரு சுமாரான திரில்லர் அனுபவம்.
விசாரணையில் தொடங்கி… எதிர்பாராத விடையில் முடிகிறது!