காதலுக்கு வயது ஒரு தடையா? என்ற கேள்வியை மையமாக வைத்து, அதில் நகைச்சுவையையும், குடும்ப உறவுகளையும், ஆழமான உணர்வுகளையும் கலந்து கொடுத்திருக்கும் திரைப்படம் ‘பெத்லகேம் குடும்ப யூனிட்’.
மத்திய வயதில் இருக்கும் நிவின் பாலி, தனது கடந்த கால காதலின் நினைவுகளுடன் தனிமையில் வாழ்ந்து வருகிறார். இந்த சூழலில், அவரது பக்கத்து வீட்டில் கல்லூரி மாணவியான மமிதா பைஜு தனது குடும்பத்துடன் குடியேறுகிறார். ஆரம்பத்தில் இருவருக்கும் இடையே உருவாகும் நட்பு, படிப்படியாக காதலாக மாறுகிறது. இந்த காதல் அவர்களது வாழ்க்கையில் ஏற்படுத்தும் மாற்றங்களும், அதைச் சுற்றி நிகழும் சுவாரஸ்யமான சம்பவங்களுமே படத்தின் மையக்கரு.
கதையின் நாயகனாக வரும் நிவின் பாலி, தனது கதாபாத்திரத்தின் வயது, மனநிலை மற்றும் காதல் உணர்வுகளை மிகவும் இயல்பாக வெளிப்படுத்தியிருக்கிறார். குறிப்பாக, தன்னைவிட இளைய பெண்ணின் காதலை எதிர்கொள்ளும்போது ஏற்படும் தயக்கம், சங்கடம், மகிழ்ச்சி, மீண்டும் காதலில் விழும் பரவசம் என பல்வேறு உணர்வுகளை உடல்மொழியிலும் முகபாவனைகளிலும் சிறப்பாக பதிவு செய்திருக்கிறார்.
ஒரு கட்டத்தில் மீண்டும் காதலை இழக்க நேரிடுமோ என்ற அச்சமும், அதனால் ஏற்படும் வலியும் அவரது நடிப்பில் அழுத்தமாக வெளிப்படுகிறது. படத்தின் பெரும்பகுதியை தனது நடிப்பால் தாங்கிச் செல்கிறார் நிவின் பாலி.
கல்லூரி மாணவியாக வரும் மமிதா பைஜு, கதாபாத்திரத்திற்கு தேவையான துள்ளலையும் குறும்புத்தனத்தையும் சிறப்பாக வழங்கியிருக்கிறார். தனது காதலை வெளிப்படுத்துவதிலும், வயது வித்தியாசத்தை பெரிதாக எடுத்துக்கொள்ளாமல் அதை அணுகுவதிலும் அவரது கதாபாத்திரம் சுவாரஸ்யத்தை ஏற்படுத்துகிறது.
நிவின் பாலியுடன் இணைந்து வரும் காட்சிகளில் இருவருக்குமான கெமிஸ்ட்ரி இயல்பாக அமைந்துள்ளது. குறிப்பாக, நகைச்சுவை கலந்த காதல் காட்சிகள் படத்தின் ரசனைக்கு முக்கிய காரணமாக இருக்கின்றன.
சங்கீத் பிரதாப், பிந்து பணிக்கர், சுரேஷ் கிருஷ்ணா, வினய் ஃபோர்ட், ஸ்ரிந்தா, ஷமீர் கான், மீனாட்சி ரவீந்திரன் உள்ளிட்ட நடிகர்கள் தங்களுக்கு வழங்கப்பட்ட கதாபாத்திரங்களை இயல்பாக கையாண்டுள்ளனர். ஒவ்வொருவரும் கதையின் போக்கில் தங்களுக்கான பங்களிப்பை வழங்குவதால், படத்தின் குடும்ப மற்றும் நகைச்சுவை பகுதிகள் வலுப்பெறுகின்றன.
அஜ்மல் சாபுவின் ஒளிப்பதிவு படத்தின் இன்னொரு பலம். கதை நிகழும் நகரம், தேவாலயம், அருகருகே அமைந்துள்ள வீடுகள் என கதை பயணிக்கும் இடங்களையே கதையின் ஒரு பகுதியாக மாற்றியிருக்கிறார். காதல் மற்றும் நகைச்சுவை காட்சிகளுக்கு ஏற்ற வகையில் காட்சிகளை பதிவு செய்திருப்பது ரசிக்க வைக்கிறது.
விஷ்ணு விஜய்யின் இசை, படத்தின் உணர்வுகளுக்கு கூடுதல் வலு சேர்க்கிறது. பாடல்கள் மட்டுமின்றி பின்னணி இசையும் கதாபாத்திரங்களின் மனநிலையை பார்வையாளர்களுக்கு கடத்துகிறது. குறிப்பாக, வார்த்தைகளால் வெளிப்படுத்த முடியாத சில காதல் உணர்வுகளுக்கு இசை அழகான துணையாக அமைந்துள்ளது.
ஆகாஷ் ஜோசப் வர்கீஸின் படத்தொகுப்பு, கதையின் வேகத்தை சீராக வைத்திருக்கிறது. காதல் கதையை வழக்கமான பாணியில் நகர்த்தாமல், நகைச்சுவை மற்றும் உணர்ச்சிகளுடன் இணைத்து காட்சிகளை அமைத்திருப்பது படத்திற்கு தனித்துவமான அனுபவத்தை கொடுக்கிறது.
கிரிஷ் ஏ.டி மற்றும் கிரண் ஜோசியின் கதை மற்றும் திரைக்கதை மிகவும் சிக்கலானதாக இல்லை. ஆனால், எளிமையான கதைக்குள் வயது வித்தியாசம் கொண்ட காதல், தனிமை, இழப்பு, குடும்ப உறவுகள் போன்ற உணர்வுகளை இயல்பாக இணைத்திருக்கிறார்கள்.
இயக்குநர் கிரிஷ் ஏ.டி, பெரிய திருப்பங்களையோ பிரம்மாண்டமான காட்சிகளையோ நம்பாமல், கதாபாத்திரங்களின் உணர்வுகளை முன்னிலைப்படுத்தி படத்தை நகர்த்தியிருக்கிறார். காதல் காட்சிகளில் மனதை தொடும் தருணங்களையும், அதே நேரத்தில் நகைச்சுவை காட்சிகளில் சிரிக்க வைக்கும் தருணங்களையும் சரியான அளவில் கலந்து கொடுத்திருப்பது படத்தின் சிறப்பு.
வழக்கமான காதல் கதைகளில் இருந்து சற்று விலகி, வயது வித்தியாசம் கொண்ட இரு மனிதர்களின் காதலை நகைச்சுவை மற்றும் உணர்வுகளுடன் சொல்ல முயற்சித்திருக்கிறது ‘பெத்லகேம் குடும்ப யூனிட்’.
பெரிய சிக்கல்கள் இல்லாமல் எளிமையாக நகர்ந்தாலும், கதாபாத்திரங்களின் உணர்வுகளும், இயல்பான நடிப்பும், நகைச்சுவையும் படத்தை ரசிக்க வைக்கின்றன.
மொத்தத்தில், காதலையும் நகைச்சுவையையும் குடும்ப உணர்வுகளோடு கலந்து சொல்லியிருக்கும் ‘பெத்லகேம் குடும்ப யூனிட்’, ரசிகர்களை மகிழ்விக்கும் ஒரு அழகான காதல் படமாக அமைந்துள்ளது.
ரேட்டிங்: ⭐⭐⭐ ⭐
