டான் பிக்சர்ஸ் தயாரிப்பில், ஆகாஷ் பாஸ்கரன் எழுத்து, இயக்கத்தில், அதர்வா முரளி நடித்த ‘இதயம் முரளி’ திரைப்படம் கடந்த ஜூலை 10-ஆம் தேதி வெளியாகி, ரசிகர்கள் மற்றும் விமர்சகர்களின் பாராட்டைப் பெற்று வெற்றிகரமாக திரையரங்குகளில் ஓடிக்கொண்டிருக்கிறது. இப்படத்தின் வெற்றியைத் தொடர்ந்து, படக்குழு பத்திரிகையாளர்களைச் சந்தித்து நன்றி தெரிவித்தது.
விழாவில் பேசிய நடிகர் அதர்வா முரளி, ‘இதயம் முரளி’ தனது திரைப்பயணத்தில் மறக்க முடியாத படமாக அமைந்துள்ளதாகவும், இயக்குநர் ஆகாஷ் பாஸ்கரனின் அர்ப்பணிப்பும், முழு படக்குழுவின் ஒற்றுமையும்தான் இந்த வெற்றிக்குக் காரணம் என்றும் தெரிவித்தார். மேலும், ரசிகர்கள் மற்றும் ஊடகங்களின் ஆதரவுக்கு நன்றி கூறினார்.
இயக்குநர் ஆகாஷ் பாஸ்கரன், படம் ரசிகர்களிடம் ஏற்படுத்திய நெகிழ்ச்சியான வரவேற்பு தங்களுக்கு மிகப்பெரிய அங்கீகாரம் எனக் கூறினார். இந்த வெற்றிக்கு காரணமான நடிகர்கள், தொழில்நுட்பக் கலைஞர்கள், தயாரிப்புக் குழு, ஊடகங்கள் மற்றும் ரசிகர்கள் அனைவருக்கும் தனது நன்றியைத் தெரிவித்தார்.
இசையமைப்பாளர் எஸ். தமன், இந்தப் படம் தனது இசைப் பயணத்தில் மிகவும் மனதுக்கு நெருக்கமான அனுபவமாக அமைந்ததாகவும், இப்படத்தின் பாடல்கள் மற்றும் பின்னணி இசைக்கு ரசிகர்கள் அளித்த வரவேற்பு மிகுந்த மகிழ்ச்சியை அளிப்பதாகவும் கூறினார்.
நடிகர்கள் நட்டி, ரக்ஷன், சுதாகர், டிராவிட், நடிகைகள் ப்ரீத்தி முகுந்தன், கயாது லோகர் உள்ளிட்ட படக்குழுவினர், படப்பிடிப்பு ஒரு குடும்பம் போல அமைந்ததையும், இயக்குநரின் அர்ப்பணிப்பும் குழுவின் ஒற்றுமையுமே படத்தின் வெற்றிக்குக் காரணம் என்றும் தெரிவித்தனர்.
காதல், நட்பு மற்றும் இனிய நினைவுகளை மையமாகக் கொண்டு உருவான ‘இதயம் முரளி’, அனைத்து தரப்பு ரசிகர்களிடமும் நல்ல வரவேற்பைப் பெற்று, வெற்றிகரமாக திரையரங்குகளில் ஓடிக்கொண்டிருக்கிறது.
