நடிகர் ரஜினி 2 மாதங்கள் கழித்து மீண்டும் தனது ரசிகர்களை சந்திக்க இருப்பதாக கூறியுள்ளார். கடந்த 8 ஆண்டுகளாக தனது ரசிகர்களை சந்திக்காமல் இருந்த நடிகர் ரஜினி, கடந்த மாதம் 5 நாட்கள் சந்தித்தார். அப்போது தமிழக அரசியலில் சிஸ்டம் சரியில்லை என்று கூறிய ரஜினி, அரசியலுக்கு வருவது பற்றி கடவுள் தான் முடிவு செய்வார் என்றார்.
மேலும் போர் வரும் போது பார்த்துக்கொள்ளலாம் என்று அவர் கூறியது, தமிழக அரசியலில் பெரும் பரபரப்பை ஏற்படுத்தியது. இந்நிலையில், தனது 164-வது படமான காலா படத்தின் முதற்கட்ட படபிடிப்பு முடிவடைந்ததால், சென்னை வந்த ரஜினி பத்திரிக்கையாளர்களுக்கு பேட்டியளித்தார். அப்போது, வரும் 24ஆம் தேதி அடுத்த கட்ட படபிடிப்பு நடக்க உள்ளதாகவும், 2 மாதங்கள் கழித்து மீண்டும் தனது ரசிகர்களை சந்திக்க உள்ளதாகவும் கூறினார். இதனால், அவரது ரசிகர்கள் உற்சாகமடைந்துள்ளனர்.
