ஜெயலலிதா, எம்.ஜி.ஆர், அசோகன், வி.கே. ராமசாமி, லட்சுமி, சோ மற்றும் பலர் நடித்த படம் மாட்டுக்கார வேலன், 46 ஆண்டுகளுக்கு பின் மீண்டும் டிஜிட்டல் தொழில்நுட்பத்துடன் புதுப்பிக்கப்பட்டு, மெருகேற்றப்பட்ட வண்ணக்கலவையில், 5.1 ஒலி அமைப்பில், சினிமாஸ்கோப்பில் ரசிகர்களை தயாராகிக் கொண்டிருக்கிறது. திரைப்படத்திற்கு இசை அமைத்தவர் திரை இசைத் திலகம் கே.வி.மகாதேவன். சினிமாஸ்கோப் தொழில்நுட்பத்துடன் உருவாக்கி ரசிகர்களை பெரிதும் கவர்ந்து 1970 இல் சென்னையில் மட்டும் அரங்கம் நிறைந்த 400 காட்சிகள் என்ற வரலாறு படைத்து பாக்ஸ் ஆபிஸ் ஹிட் ஆன, மாட்டுக்கார வேலன், இன்னும் மெருகூட்டப்பட்டு விரைவில் வெளியாக உள்ளது.
கவியரசர் கண்ணதாசனின் வரிகளோடு அமைந்த “தொட்டுக்கொள்ளவா, நெஞ்சில் தொடுத்துக்கொள்ளவா”, “ஒரு பக்கம் பாக்கிறா ” ஆகிய 2 பாடலும், “வாலிபக்கவிஞர்” வாலி வரிகளில் பூ வைத்த பூவைக்கு பூக்கள் சொந்தமா” ஆகிய இனிமையான பாடலும் அமைந்த அற்புதத் திரைக்காவியம் மாட்டுக்கார வேலன். “சத்தியம் நீயே தர்ம தாயே” பாடலும், “பட்டிக்காடா பட்டணமா” என்ற தத்துவப் பாடலும் இடம் பெற்றுள்ள திரைப்படம்.
எம்.ஜி.ஆர் படங்கள் என்றாலே காதலும் கமர்சியலும் நிறைந்து இருக்கும், அப்படி, அமைந்த படங்களில் ஒன்றான மாட்டுக்கார வேலன் மீண்டும் டிஜிட்டலில் வெளியாக இருப்பது, எம்.ஜி.ஆர் ரசிகர்களுக்கு குதூகலமான செய்தியாக இருக்கும் என்பது மட்டும் உண்மை. ஜெயந்தி பிலிம்ஸ் சார்பில் என்.கனகசபை தயாரிப்பில் உருவான இந்த மாட்டுக்கார வேலன் டிஜிட்டல் பதிப்பை சாய் வெங்கட் ராமா பிலிம்ஸ் சார்பில் சுனிதா வெளியிடுகிறார்.
