அம்மாவின் திட்டங்கள் வெற்றியை ஆர்.கே.நகர் தொகுதியில் தேடித்தரும் – தினகரன்

டி.டி.வி. தினகரனிடம் நிருபர்கள் கேட்ட கேள்விகளுக்கு அவர் அளித்த பதில் வருமாறு,

கேள்வி – ஆர்.கே.நகர் தொகுதியில் வெற்றிவாய்ப்பு எப்படி உள்ளது?

பதில் – ஆர்.கே.நகர் தொகுதி புரட்சித்தலைவி அம்மாவின் தொகுதி. இந்த தொகுதியில் 1996-க்கு பிறகு வெற்றி பெற முடியவில்லை. மறைந்த முதல்வர் இத்தொகுதியில் செய்த திட்டங்கள் எனக்கு வெற்றியை தேடித்தரும்.

கேள்வி –  நீங்கள் ஓட்டுக்கு பணம் கொடுக்கப் போவதாக கூறப்படுகிறதே?

பதில் – வாக்காளர்களுக்கு பணப்பட்டுவாடா செய்ய வேண்டிய அவசியம் எங்களுக்கு இல்லை. இந்த தொகுதியில் மறைந்த முதல்வர் அம்மாவின் சாதனை திட்டங்களுக்கு மக்கள் தாமாக முன்வந்து வாக்களிப்பார்கள்.

கேள்வி –  உங்கள் மீது பல்வேறு புகார்களை கூறி முடக்கப் பார்க்கிறார்களா?

பதில் – அரசியல் வியாபாரத்திற்காக என்னை முடக்க பார்க்கிறார்கள். அது நடக்காது. இங்கிருந்து பிரிந்து சென்ற துரோகிகளோடு எதிரிகளும் சேர்ந்து சதி செய்கிறார்கள்.

ஆனால் ஆர்.கே.நகர் தொகுதியில் அம்மாவின் ஆசியோடு நான் வெற்றி பெறுவேன். ஏப்ரல் 12ஆம் தேதிக்கு பிறகு எதிரிகளின் கூடாரம் காலியாகி விடும்.

கேள்வி –  முடக்கப்பட்ட இரட்டை இலையை மீண்டும் பெற முயற்சி செய்கிறீர்களா?

பதில் – துரோகிகளின் செயலால் இரட்டை இலை முடக்கப்பட்டுள்ளது. ஆனாலும் புரட்சித் தலைவர், அம்மாவின் ஆசி பெற்ற ‘தொப்பி’ சின்னம் எனக்கு கிடைத்துள்ளது. இதில் வெற்றிபெற்று இரட்டை இலையை மீட்டெடுப்பேன்.  இவ்வாறு அவர் கூறினார்.