ஆர்.கே.நகர் தொகுதியில் ஏப்ரல் 12ஆம்தேதி இடைத்தேர்தல் நடக்கிறது. இதற்கான வேட்பு மனு தாக்கல் கடந்த 16ஆம்தேதி தொடங்கியது. தண்டையார்பேட்டையில் உள்ள மண்டல அலுவலகத்தில் வேட்பு மனுக்கள் பெறப்பட்டன. தி.மு.க. வேட்பாளர் மருதுகணேஷ், தே.மு.தி.க. வேட்பாளர் மதிவாணன், மார்க்சிஸ்ட் கம்யூனிஸ்டு வேட்பாளர் லோகநாதன், நாம் தமிழர் கட்சி வேட்பாளர் கலைக்கோட்டுதயம், என்தேசம்- என் உரிமை கட்சி வேட்பாளர் ஜெயந்தி சந்திரன் ஆகியோர் ஏற்கனவே வேட்பு மனு தாக்கல் செய்து இருந்தனர். வேட்பு மனு தாக்கல் செய்ய இன்று கடைசி நாள் ஆகும்.
இதனால் தண்டையார்பேட்டை மண்டல அலுவலகம் மிகவும் பரபரப்புடன் காணப்பட்டது. அந்த பகுதியில் போக்குவரத்து நிறுத்தப்பட்டது. போலீஸ் பாதுகாப்பும் அதிகமாக போடப்பட்டு இருந்தது. கடைசி நாளான இன்று காலை ஓ.பி.எஸ். அணியை சேர்ந்த மதுசூதனன், சமத்துவ மக்கள் கட்சி வேட்பாளர் அந்தோணி சேவியர் ஆகியோர் மனு தாக்கல் செய்தனர். சசிகலா அணியை சேர்ந்த டி.டி.வி.தினகரன், பா.ஜனதா வேட்பாளர் கங்கை அமரன், தீபா ஆகியோர் பிற்பகலில் மனுதாக்கல் செய்தனர்.
முக்கிய வேட்பாளர்கள் மனு தாக்கல் செய்த நிலையில், இன்று பிற்பகல் 3 மணியுடன் வேட்பு மனு தாக்கல் முடிந்தது. வேட்பு மனுக்கள் நாளை பரிசீலனை செய்யப்படும். வேட்பு மனுவை வாபஸ் பெற 27ஆம்தேதி கடைசி நாள் ஆகும். வேட்பாளர்களின் அனல் பறக்கும் பிரச்சாரத்திற்குப் பிறகு ஏப்ரல் 12ஆம்தேதி வாக்குப்பதிவு நடத்தப்படுகிறது. 15ஆம் தேதி வாக்குகள் எண்ணப்பட்டு முடிவுகள் அறிவிக்கப்படும்.
