காரைக்குடி காளை – சேப்பாக் சூப்பர் கில்லீஸ் நாளை மோதல்

டி.என்.பி.எல். என்று அழைக்கப்படும் தமிழ்நாடு பிரிமீயர் ‘லீக்’ 20 ஓவர் கிரிக்கெட் போட்டி சென்னை, நெல்லை, திண்டுக்கல் ஆகிய 3 இடங்களில் நடைபெற்று வருகிறது. அறிமுக டி.என்.பி.எல். போட்டியில் 2வது இடத்தை பிடித்த சேப்பாக் சூப்பர் கில்லீஸ் அணி நெல்லையில் நடந்த தனது முதல் ஆட்டத்தில் திருவள்ளூர் வீரன்சை 6 விக்கெட் வித்தியாசத்திலும், சென்னையில் நடந்த 2-வது ஆட்டத்தில் கோவை கிங்சை 6 விக்கெட் வித்தியாசத்திலும் வீழ்த்தின. நெல்லையில் நடைபெற்ற 3-வது ஆட்டத்தில் நடப்பு சாம்பியன் தூத்துக்குடி பேட்ரியாட்சிடம் 27 ரன் வித்தியாசத்தில் தோற்றது.

2 வெற்றி, 1 தோல்வியுடன் 4 புள்ளிகளை பெற்று இருக்கும் சேப்பாக் சூப்பர் கில்லீஸ் அணி 4-வது ஆட்டத்தில் காரைக்குடி காளையை சந்திக்கிறது. இந்த ஆட்டம் சென்னையில் நாளை (வெள்ளிக்கிழமை) இரவு 7.15 மணிக்கு நடக்கிறது. சேப்பாக் சூப்பர் கில்லீஸ் அணி சென்னையில் நடந்த ஆட்டத்தில் ஏற்கனவே கோவையை தோற்கடித்து இருந்தது. இதனால் காரைக்குடி காளையை மிகுந்த நம்பிக்கையுடன் எதிர்கொள்ளும். ‘பிளேஆப்’ சுற்று வாய்ப்பில் தொடர்ந்து நீடிக்க இந்த ஆட்டத்தில் வெற்றி பெற வேண்டிய நிலையில் சேப்பாக் சூப்பர் கில்லீஸ் அணி இருக்கிறது.

அந்த அணி 3-வது வெற்றி ஆர்வத்தில் உள்ளது. சேப்பாக் சூப்பர் கில்லீஸ் அணியில் தொடக்க வீரர்கள் கோபிநாத், தலைவன் சற்குணம், எஸ்.கார்த்திக், அந்தோணிதாஸ், சாய்கிஷோர், அலெக்சாண்டர் போன்ற சிறந்த வீரர்கள் உள்ளனர். கேப்டன் சதீஷ் பந்துவீச்சில் சிறப்பாக செயல்பட்டாலும், பேட்டிங்கில் சொதப்பி வருகிறார். இதனால் அவர் தனது பேட்டிங் திறனை வெளிப்படுத்த வேண்டிய நெருக்கடியில் உள்ளார். நாளைய போட்டியில் முதலில் பேட்டிங் செய்து மிகப் பெரிய ரன்னை குவிக்கவே சேப்பாக் சூப்பர் கில்லீஸ் அணி விரும்பும்.

காரைக்குடி காளை அணி 4 ஆட்டத்தில் விளையாடி 2 வெற்றி, 2 தோல்வியுடன் 4 புள்ளி பெற்றுள்ளது. அந்த அணி மதுரை சூப்பர் ஜெயன்ட், திருவள்ளூர் வீரன்ஸ் அணிகளை வென்று இருந்தது. கோவை கிங்ஸ், தூத்துக்குடி பேட்ரியாட்ஸ் அணிகளிடம் தோற்று இருந்தது. அந்த அணியும் 3வது வெற்றி பெறும் ஆர்வத்தில் இருக்கிறது.  காரைக்குடி காளை அணியில் தொடக்க வீரர் அனிருதா ஸ்ரீகாந்த் நல்ல நிலையில் உள்ளார். திருவள்ளூர் வீரன்சுக்கு எதிராக அவர்தான் தனது அணியை வெற்றிபெற வைத்தார்.

இது தவிர ஷாஜகான், கணபதி, விஷால் வைத்யா போன்ற சிறந்த வீரர்களும் உள்ளனர். இரு அணிகளும் வெற்றிக்காக கடுமையாக போராடுவார்கள் என்பதால் ஆட்டம் விறுவிறுப்பாக இருக்கும். ஸ்டார் ஸ்போர்ட்ஸ் டெலிவி‌ஷனில் இந்தப் போட்டி நேரடியாக ஒளிபரப்பு செய்யப்படுகிறது.