வடசென்னையில் மெடிக்கல் ஷாப் ஒன்றை நடத்தி வருகிறார் சமுத்திரகனி. இவருக்கு ரவுடிகளிடம் வேலை பார்த்து வரும் பரத் சீனியும், ஹோட்டலில் வேலை பார்த்துக் கொண்டு, கூடைப்பந்தாட்டத்தில் ஆர்வமாக இருக்கும் இசக்கி பரத்தும், ஆட்டோ ஓட்டி, கார் வாங்க வேண்டும் என்ற குறிக்கோளில் இருக்கும் வினோத்தும், தனித்தனியாக பழக்கமாகிறார்கள்.
அதே பகுதியில் இருக்கும் சுபிக்ஷாவை காதலிக்கிறார் பரத் சீனி. சுபிக்ஷாவின் அம்மா ரோகினிக்கு இவர்களின் காதல் தெரிய வர, ரவுடியிடம் வேலை செய்வதை விட்டு விட்டு வேறு நல்ல வேலைக்கு போக சொல்கிறார். பரத் சீனியும் அத்தொழிலை விட்டு நல்ல வேலை தேடி வருகிறார். ஒரு சமயத்தில் மீண்டும் ரவுடியுடன் இணையும் நிலை உருவாகிறது.
கூடைப்பந்தாட்டத்தில் வெற்றி அடைந்தால் நல்ல வேலைக்கு போகலாம் என்று தீவிரமாக பயிற்சி செய்து வருகிறார் இசக்கி பரத். இவர் கிரிஷா குரூப்பை காதலிக்கிறார். இந்த காதல் விவகாரம் தெரிந்த ஜாதி தலைவர் கிரிஷா குரூப்பை அடித்து விடுகிறார். அவர் மீது புகார் கொடுக்க செல்லும் கிரிஷா குரூப்க்கும், இசக்கி பரத்க்கும் போலீஸ் திருமணம் செய்து வைக்கிறார்கள். பிறகு இசக்கி பரத்தை அடித்து போட்டு விட்டு, கிரிஷா குரூப்பை அழைத்து சென்று விடுகிறார் ஜாதி தலைவர்.
