அதிரடி, உணர்வுகள், குடும்பப் பாசம் எனப் பல அம்சங்களைக் கலந்து சொல்லப்பட்டுள்ள உளவுத்துறை ஆபரேஷன் கதைதான் ‘ஓம்’.
ரகசிய உளவாளியாகச் செயல்படும் தனுஷ், செம்மரக் கடத்தல் உலகின் முக்கியப் புள்ளியான மம்முட்டியின் நம்பிக்கையைப் பெறுவதற்காக அவரிடம் நெருக்கமாகப் பழகுகிறார். ஒரு கட்டத்தில் தம்பியைப் போன்ற உறவை உருவாக்கிக்கொண்டு, அங்கிருந்து கிடைக்கும் ரகசியத் தகவல்களை ஐபிஎஸ் அதிகாரியான சாய் பல்லவிக்குக் கடத்துகிறார். இதன் தொடர்ச்சியாகத் தொடங்கும் ‘ஓம் ஆபரேஷன்’ பல எதிர்பாராத திருப்பங்களைச் சந்திக்கிறது.
இதற்கிடையே மனைவி ஸ்ரீலீலா, தந்தை இந்திரன்ஸ், மகன் எனத் தனது குடும்ப வாழ்க்கையையும் சுமந்து செல்லும் தனுஷின் இன்னொரு முகமும் கதையில் இடம்பெறுகிறது. இடைவேளைக்குப் பிறகு கதை சட்டத்தின் அதிகாரத்திற்கும் சாமானிய மக்களின் வாழ்வாதாரத்திற்கும் இடையிலான போராட்டமாக மாறுகிறது. தொடர்ந்து வரும் திருப்பம் கதையின் போக்கையே மாற்றுகிறது.
ரகசிய உளவாளி, பாசமுள்ள மகன், அன்பான கணவன், பொறுப்பான தந்தை எனப் பல்வேறு உணர்வுகளை வெளிப்படுத்தும் கதாபாத்திரத்தில் தனுஷ் தனது நடிப்புத் திறமையை மீண்டும் நிரூபித்துள்ளார். ஆக்ஷன் காட்சிகளிலும் நடனத்திலும் அவரது வழக்கமான வேகம் படத்திற்குப் பலம். சாய் பல்லவி தனக்குக் கொடுக்கப்பட்ட கதாபாத்திரத்தில் சிறப்பான பங்களிப்பை வழங்கியுள்ளார். அவரது தோற்றமும் நடிப்பும் ரசிகர்களைக் கவரும் வகையில் அமைந்துள்ளன.
மம்முட்டியின் கதாபாத்திரம் இன்னும் வலுவாக வடிவமைக்கப்பட்டிருக்கலாம். அவரைப் போன்ற ஒரு சிறந்த நடிகருக்குக் கொடுக்கப்பட்டுள்ள பாத்திரத்தின் ஆழம் போதுமானதாக இல்லை. ஸ்ரீலீலா வழக்கமான நாயகி கதாபாத்திரத்திற்குள் அடங்கிவிடுகிறார். இந்திரன்ஸ் தனது இயல்பான நடிப்பால் கவனம் ஈர்க்கிறார்.
ஒளிப்பதிவாளர் எழிலரசுவின் கேமரா படம் முழுவதும் சிறப்பான காட்சியனுபவத்தைத் தருகிறது. குறிப்பாக, இருள் சூழ்ந்த என்கவுன்டர் காட்சிகளில் பயன்படுத்தப்பட்டுள்ள கேமரா கோணங்களும் காட்சியமைப்புகளும் அந்தச் சூழலின் வலியைப் பார்வையாளர்களுக்கு உணர்த்துகின்றன. சாய் அபயங்கரின் இசை படத்திற்கு கூடுதல் பலம். பாடல்களிலும் பின்னணி இசையிலும் தனது தனித்துவத்தை வெளிப்படுத்தியுள்ளார். குறிப்பாக, ‘ஆல்டைம் அன்பாயிருப்போம்’ பாடல் ரசிகர்களின் விருப்பப் பட்டியலில் இடம்பிடிக்கும்.
வலிமையான கதைக்களத்தைத் தேர்ந்தெடுத்த இயக்குநர் ராஜ்குமார் பெரியசாமி, அதை உணர்வுபூர்வமாகச் சொல்ல முயற்சித்துள்ளார்.
மொத்தத்தில், நல்ல கதைக்களமும் திறமையான நடிகர்களின் பங்களிப்பும் இருந்தும், திரைக்கதையின் வேகத்திலும் வில்லன் கதாபாத்திரங்களின் வலிமையிலும் இன்னும் கவனம் செலுத்தியிருக்கலாம். ஆக்ஷன் மற்றும் எமோஷன் கலந்த இந்தப் படம் தனுஷ் ரசிகர்களுக்கு ஒருமுறை பார்க்கக்கூடிய படமாக அமைகிறது.


