காவல்துறை விசாரணை, மர்மக் கொலைகள், எதிர்பாராத திருப்பங்கள் என கிரைம் திரில்லர் ரசிகர்களைக் கவரும் வகையில் உருவாகியிருக்கும் திரைப்படம் ‘சீன்’.
குற்றவாளிகளைக் கண்டுபிடிப்பதில் தனித்துவமான திறமை கொண்ட காவல்துறை அதிகாரி சூர்யா, திடீரென தனது பணியிலிருந்து விலகுகிறார். அதற்குக் காரணம் அவரது கண் பார்வை பறிபோனதுதான். இந்தச் சூழலில், ஏற்கெனவே அவர் கைது செய்த சைக்கோ கொலையாளியின் பாணியில் நகரில் அடுத்தடுத்து கொலைகள் அரங்கேறுகின்றன. சிறையில் இருக்கும் குற்றவாளிக்கும் புதிய கொலைகளுக்கும் தொடர்பில்லை என்பதை உணரும் சூர்யா, உண்மையான கொலையாளியைத் தேடத் தொடங்குகிறார்.
பார்வை இல்லாததால் காவல்துறையின் ஆதரவு கிடைக்காத நிலையிலும், தனது விசாரணைத் திறன் மீது நம்பிக்கை வைத்து களமிறங்கும் சூர்யா, நஸ்ரியாவைத் துணையாகக் கொண்டு மர்மத்தின் பின்னணியை ஆராய்கிறார். பார்வையை இழந்த ஒரு காவல்துறை அதிகாரி, தனது அறிவையும் அனுபவத்தையும் மட்டுமே நம்பி கொலையாளியைத் தேடும் இந்தப் பயணமே படத்தின் பிரதான சுவாரஸ்யம்.
இதுவரை பல்வேறு கதாபாத்திரங்களில் நடித்திருந்தாலும், பார்வையற்ற முன்னாள் காவல்துறை அதிகாரியாக சூர்யா வெளிப்படுத்தியிருக்கும் நடிப்பு படத்தின் மிகப்பெரிய பலம். தனது குறைபாட்டை மறைத்துக்கொண்டு இயல்பாகச் செயல்பட முயற்சிப்பது, சில தருணங்களில் ஏற்படும் தடுமாற்றம், மனதளவில் ஏற்படும் போராட்டம் என கதாபாத்திரத்தின் ஒவ்வொரு உணர்வையும் நுணுக்கமாக வெளிப்படுத்தியிருக்கிறார். ஆக்ஷன் மற்றும் கம்பீரமான காவல்துறை அதிகாரி என்ற வழக்கமான பிம்பத்தைத் தாண்டி, நடிப்புக்கு முக்கியத்துவம் உள்ள கதாபாத்திரத்திலும் தன்னால் சிறப்பாகச் செயல்பட முடியும் என்பதை நிரூபித்திருக்கிறார்.
நஸ்ரியா நஸீம், சூர்யாவுக்கு உதவியாளராகவும் அவரது நம்பிக்கைக்குரிய துணையாகவும் கதையில் முக்கியப் பங்கு வகிக்கிறார். தனது துறுதுறுப்பான நடிப்பால் காட்சிகளுக்கு உற்சாகம் சேர்க்கும் அவர், சூர்யாவுடனான உணர்வுப்பூர்வமான தருணங்களிலும் கவனம் ஈர்க்கிறார். குறிப்பாக, சூர்யாவின் பார்வையாக இருந்து அவருக்கு வழிகாட்டும் காட்சிகள் ரசிக்கும்படி அமைந்துள்ளன.
நஸ்லன் தனது இயல்பான நடிப்பின் மூலம் கதைக்கு மேலும் வலு சேர்க்கிறார். தேவையற்ற மிகைப்படுத்தல்கள் இல்லாமல், கதாபாத்திரத்தின் தன்மைக்கு ஏற்ப வெளிப்படுத்தியிருக்கும் நடிப்பு பாராட்டுக்குரியது. சூர்யாவுடன் இணைந்து வரும் காட்சிகளிலும் தனது இருப்பை அழுத்தமாகப் பதிவு செய்கிறார்.
சூர்யாவின் தந்தையாக ஆனந்தராஜ், காவல்துறை உயர் அதிகாரியாக லால், இன்ஸ்பெக்டர் சிபியாக ராஜ்பிரியன், இன்ஸ்பெக்டர் வினோத்தாக சுரேஷ் மதிழயகன், நஸ்ரியாவின் தந்தையாக கஜராஜ் ஆகியோர் தங்களுக்குக் கொடுக்கப்பட்ட கதாபாத்திரங்களை இயல்பாகக் கையாண்டிருக்கிறார்கள். இவர்களின் பங்களிப்பு கதையின் நகர்வுக்கு துணையாக அமைந்துள்ளது.
படத்தின் மையக்கருவான புலனாய்வு அம்சம் பார்வையாளர்களிடம் ஆர்வத்தை ஏற்படுத்துகிறது. பார்வையற்ற ஒருவர் குற்றவாளியைக் கண்டுபிடிக்க மேற்கொள்ளும் முயற்சி என்பதே கதைக்கு வித்தியாசமான அடையாளத்தைக் கொடுக்கிறது. அதேசமயம், விசாரணையின் ஒவ்வொரு கட்டத்திலும் அடுத்தது என்ன நடக்கும் என்ற எதிர்பார்ப்பை உருவாக்குவது திரைக்கதையின் முக்கிய நோக்கமாக இருக்கிறது.
இயக்குநர் வழக்கமான காவல்துறை விசாரணைக் கதையிலிருந்து விலகி, கதாநாயகனின் தனிப்பட்ட குறைபாட்டையே விசாரணையின் முக்கிய சவாலாக மாற்றியிருப்பது பாராட்டத்தக்க முயற்சி. கதாபாத்திரங்களின் உணர்வுகளுக்கும் மர்ம முடிச்சுகளுக்கும் முக்கியத்துவம் கொடுத்து உருவாக்கியிருக்கும் இந்தப் படம், கிரைம் திரில்லர் வகையில் புதிய அனுபவத்தைத் தர முயற்சிக்கிறது.
மொத்தத்தில், வித்தியாசமான கதைக்களம், சூர்யாவின் சிறப்பான நடிப்பு, நஸ்ரியாவின் இயல்பான பங்களிப்பு என மர்மமும் புலனாய்வும் கலந்த ஒரு சுவாரஸ்யமான திரில்லர் அனுபவமாக அமைந்திருக்கிறது ‘சீன்’.
