மக்கள் செல்வன் விஜய் சேதுபதி, லிஜோ மோல் ஜோஸ், ஹரிகிருஷ்ணன், சாந்தி பாலச்சந்திரன், அர்ஜுன் சிதம்பரம், சாய் பிரித்வி ராஜ், சஹஸ்ரா உள்ளிட்டோர் நடிப்பில், பாலாஜி தரணிதரன் இயக்கத்தில் உருவாகியுள்ள திரைப்படம் ‘பத்தா’. அக்டோபர் 1ஆம் தேதி திரையரங்குகளில் வெளியான இப்படம், விமர்சன ரீதியாக நல்ல வரவேற்பைப் பெற்று வருவதுடன், திரையரங்குகளின் எண்ணிக்கையும் அதிகரிக்கப்பட்டு வெற்றிகரமாக ஓடிக்கொண்டிருக்கிறது.
அட்லீ வழங்கும் இப்படத்தை ஸ்டார் ஸ்டுடியோ18, ஏ ஃபார் ஆப்பிள் ஸ்டுடியோஸ் மற்றும் சினி 1 ஸ்டுடியோஸ் நிறுவனங்கள் சார்பில் முராத் கெதானி, பிரியா அட்லீ, அலோக் ஜெயின் மற்றும் அஜித் அந்தாரே ஆகியோர் தயாரித்துள்ளனர். சாய் அப்யங்கர் இசையமைக்க, செல்வகுமார் எஸ்.கே. ஒளிப்பதிவு செய்துள்ளார். ஆர். கலைவாணன் படத்தொகுப்பு பணிகளை மேற்கொண்டுள்ளார்.
படத்தின் வெற்றியை கொண்டாடும் வகையில் நடைபெற்ற சக்சஸ் மீட் நிகழ்ச்சியில் படக்குழுவினர் கலந்து கொண்டு தங்களது அனுபவங்களைப் பகிர்ந்து கொண்டனர்.
ஒளிப்பதிவாளர் செல்வகுமார் பேசுகையில், இப்படத்தில் வாய்ப்பு வழங்கிய அட்லீ மற்றும் இயக்குநர் பாலாஜி தரணிதரனுக்கு நன்றி தெரிவித்தார். விஜய் சேதுபதி, லிஜோ மோல் ஜோஸ் உள்ளிட்ட அனைவரும் சிறப்பாக நடித்துள்ளதாகக் குறிப்பிட்ட அவர், குறிப்பாக ‘செல்ல மகளே’ பாடலின் படப்பிடிப்பின்போதே தான் உணர்ச்சிவசப்பட்டதாக தெரிவித்தார்.
தயாரிப்பு வடிவமைப்பாளர் முத்துராஜ் பேசுகையில், படத்தில் நடித்த அனைவரையும் பாராட்டியதுடன், விஜய் சேதுபதியின் நடிப்பில் இடம்பெற்ற நுட்பமான விஷயங்கள் தன்னை ஆச்சரியப்படுத்தியதாகக் கூறினார். 80களின் காலகட்டத்தை திரையில் கொண்டு வருவதற்கு படக்குழுவினர் மேற்கொண்ட பணிகளையும் அவர் பாராட்டினார்.
இணை வசனகர்த்தா கரன் கார்க்கி பேசும்போது, 16 ஆண்டுகளாக சினிமா கனவுடன் பயணித்து வந்த தனக்கு ‘பத்தா’ திரைப்படம் முக்கியமான வாய்ப்பாக அமைந்துள்ளதாகக் கூறினார். சென்னை வட்டார மொழியை அதன் இயல்புடன் பயன்படுத்த வேண்டும் என்ற இயக்குநரின் அணுகுமுறை தன்னை கவர்ந்ததாகவும், இப்படத்தின் திரைக்கதை ஒரு பயிற்சி நிலையத்தில் பாடமாக வைக்கும் அளவிற்கு சிறப்பாக அமைந்துள்ளதாகவும் தெரிவித்தார்.
நடிகர் அர்ஜுன் சிதம்பரம் பேசுகையில், ‘பத்தா’ தங்களுக்கு அனைவருக்கும் முக்கியமான படம் என்றார். நல்ல கதையை நம்பினால் அது வெற்றியைத் தேடிக் கொண்டு வரும் என்பதற்கு இப்படம் ஓர் உதாரணம் என்றும், நல்ல சினிமாவை எதிர்பார்க்கும் ரசிகர்களின் ஏக்கத்தை ஓரளவு போக்கும் படமாக இது அமைந்துள்ளதாகவும் கூறினார்.
நடிகை லிஜோ மோல் ஜோஸ் பேசும்போது, ‘கன்னிமா’ கதாபாத்திரத்தை ஏற்றுக்கொண்ட ரசிகர்களுக்கு நன்றி தெரிவித்தார். படத்தில் பணியாற்றிய ஒவ்வொரு துறையினரும் தங்களது சிறந்த பங்களிப்பை வழங்கியுள்ளதாகக் கூறிய அவர், இயக்குநர் பாலாஜி தரணிதரனின் பொறுமையையும் பாராட்டினார். விஜய் சேதுபதியுடன் பணியாற்றியது தனக்கு மிகப்பெரிய அனுபவம் என்றும், சக கலைஞர்களுக்கு அவர் வழங்கும் சுதந்திரம் ஆச்சரியப்படுத்தியதாகவும் தெரிவித்தார்.
இசையமைப்பாளர் சாய் அப்யங்கர் பேசுகையில், ஆரம்பத்தில் தன்னை இயக்குநர் நம்பவில்லை என்றாலும், தனது பாடல்கள் மூலம் அந்த நம்பிக்கையை ஏற்படுத்தியதாகக் கூறினார். பின்னணி இசையிலும் பணியாற்றும் வாய்ப்பு கிடைத்தது மகிழ்ச்சி அளிப்பதாகவும், படத்தில் நடித்த அனைவரும் சிறப்பாக பணியாற்றியுள்ளதாகவும் தெரிவித்தார்.
இயக்குநர் பாலாஜி தரணிதரன் பேசுகையில், இப்படத்திற்கு வாய்ப்பு வழங்கிய தயாரிப்பாளர்களுக்கு நன்றி தெரிவித்தார். முதலில் விஜய் சேதுபதியிடம் கதையை கூறியதாகவும், அவர் கதையை விரும்பி அட்லீயிடம் அழைத்துச் சென்றதாகவும் தெரிவித்தார். விஜய் சேதுபதி ஒரு ‘இயக்குநர்களின் நடிகர்’ என்பதை இப்படத்தின் மூலம் மீண்டும் நிரூபித்துள்ளதாகவும் கூறினார்.
சிறுவன் சாய் பிரித்வி ராஜ், சிறுமி சஹஸ்ரா உள்ளிட்ட இளம் கலைஞர்களின் பங்களிப்பையும் இயக்குநர் பாராட்டினார். படத்தின் ஒவ்வொரு துறையிலும் பணியாற்றிய தொழில்நுட்பக் கலைஞர்கள் படத்தின் மீது வைத்திருந்த நம்பிக்கையே திரையில் சிறப்பாக வெளிப்பட்டுள்ளதாகவும் தெரிவித்தார்.
நடிகர் விஜய் சேதுபதி பேசுகையில், ‘பத்தா’ திரைப்படத்திற்கு ஊடகங்கள் மற்றும் ரசிகர்கள் அளித்த ஆதரவுக்கு நன்றி தெரிவித்தார். ஒரு திரைப்படத்தை உருவாக்கி, அது ரசிகர்களிடம் சென்று சேரும் தருணம் மிகவும் பதற்றமானது என்றும், ரசிகர்கள் படத்தை தங்களது சொந்தப் படமாக ஏற்றுக்கொண்டு கொண்டாடும்போது மிகுந்த மகிழ்ச்சி ஏற்படுவதாகவும் கூறினார்.
இயக்குநர் பாலாஜி தரணிதரனைப் பற்றி பேசிய விஜய் சேதுபதி, அவரது முந்தைய படங்களான ‘நடுவுல கொஞ்சம் பக்கத்த காணோம்’, ‘சீதக்காதி’ உள்ளிட்ட படங்களை குறிப்பிட்டு, அவர் தொடர்ந்து வித்தியாசமான படங்களை உருவாக்கி வருவதாக பாராட்டினார். லிஜோ மோல் ஜோஸ், சாய் பிரித்வி ராஜ் உள்ளிட்ட படக்குழுவினரின் பங்களிப்பையும் அவர் பாராட்டினார்.
நிறைவாக தயாரிப்பாளர் அட்லீ பேசுகையில், ‘பத்தா’ படத்தின் வெற்றியை தங்களது பயணத்தின் முக்கியமான அனுபவமாகக் குறிப்பிட்டார். தன்னைப் பற்றிய விமர்சனங்களை பொருட்படுத்தாமல், தனது நம்பிக்கையுடன் தொடர்ந்து பயணிப்பதாகக் கூறிய அவர், நல்ல அனுபவங்கள் வாழ்க்கையில் அடுத்த கட்டத்திற்கு அழைத்துச் செல்லும் என்றும் தெரிவித்தார்.
விஜய் சேதுபதி ஒரு சிறந்த நடிகர் மட்டுமல்லாமல் நல்ல மனிதர் என்றும் பாராட்டிய அட்லீ, அவரை இந்திய அளவில் மேலும் உயரத்திற்கு கொண்டு செல்ல வேண்டும் என்ற தனது விருப்பத்தையும் தெரிவித்தார். மேலும், இசையமைப்பாளர் சாய் அப்யங்கரை பாராட்டிய அவர், எதிர்காலத்தில் அவர் தமிழ்நாட்டின் பெருமைக்குரிய இசையமைப்பாளராக வளர்வார் என நம்பிக்கை தெரிவித்தார்.
‘பத்தா’ திரைப்படம் தொடர்ந்து வெற்றிப் பாதையில் பயணித்து வரும் நிலையில், படக்குழுவினரும் ரசிகர்களின் ஆதரவுக்கு நன்றி தெரிவித்துள்ளனர்.