இயக்குநர் இளன் முதன்முறையாக கதாநாயகனாக நடித்துள்ள ‘பியார் பிரேமா கல்யாணம்’ திரைப்படத்தின் டிரெய்லர் வெளியீட்டு விழா இன்று படக்குழுவினர் முன்னிலையில் நடைபெற்றது. ரைஸ் ஈஸ்ட் என்டர்டெயின்மென்ட் தயாரிக்கும் இப்படத்திற்கு யுவன் சங்கர் ராஜா இசையமைத்துள்ளார்.
விழாவில் இயக்குநர் வெற்றிமாறன், நடிகர்கள் ராதிகா, இளங்கோ குமரவேல், செந்தில், யோகிபாபு உள்ளிட்டோர் கலந்துகொண்டு படக்குழுவினரை வாழ்த்தினர்.
இயக்குநர் வெற்றிமாறன் பேசுகையில், இயக்குநராக இருந்து நடிகராக இளன் மாறியிருப்பது பாராட்டுக்குரியது என்றும், டிரெய்லர் மிகவும் சுவாரஸ்யமாகவும் நகைச்சுவையாகவும் இருப்பதாகவும் தெரிவித்தார்.
நடிகை ராதிகா, இப்படம் ஒரு வித்தியாசமான காதல் கதையாக உருவாகியுள்ளதாகவும், இன்றைய இளைஞர்களின் காதல், திருமணம் மற்றும் வாழ்க்கை குறித்த மாறுபட்ட பார்வைகளை படம் பேசுவதாகவும் கூறினார்.
நடிகர் யோகிபாபு, ‘ஸ்டார்’ படத்திலிருந்தே இளனுடன் இணைந்து பணியாற்ற வேண்டும் என்ற பேச்சு இருந்ததாகவும், தற்போது அது நிறைவேறியுள்ளதாகவும் தெரிவித்தார்.
நடிகை சான்வி மேக்னா, ஒரே நேரத்தில் இயக்குநராகவும் நடிகராகவும் இளன் சிறப்பாக செயல்பட்டதாக பாராட்டினார். மேலும், இப்படத்தில் முழுமையாக தமிழில் டப்பிங் பேசியுள்ளதாகவும் தெரிவித்தார்.
இளன் பேசுகையில், இன்றைய இளைஞர்கள் ரசிக்கும் வகையில் இப்படம் உருவாகியுள்ளதாகவும், யுவன் சங்கர் ராஜாவின் இசை படத்திற்கு மிகப்பெரிய பலம் என்றும் கூறினார்.
இசையமைப்பாளர் யுவன் சங்கர் ராஜா, படம் மிகவும் சிறப்பாக வந்துள்ளதாகவும், குடும்பத்துடன் ரசிக்கக்கூடிய நல்ல என்டர்டெயினராக இருக்கும் என்றும் தெரிவித்தார்.
திருமணத்திற்குப் பிறகு மனைவி தனது பெற்றோர் வீட்டை விட்டு செல்ல விரும்பாத நிலையில், கணவரும் அங்கேயே வசிக்க நேரிடும் சூழலை மையமாக வைத்து காதல், திருமண வாழ்க்கை, குடும்ப உறவுகள் மற்றும் நகைச்சுவை கலந்து இப்படம் உருவாகியுள்ளது.
இளன், சான்வி மேக்னா, ராதிகா சரத்குமார், யோகிபாபு, எம்.எஸ். பாஸ்கர், இளங்கோ குமரவேல், செந்தில் உள்ளிட்டோர் நடித்துள்ள இப்படம் ஆகஸ்ட் 21 முதல் உலகம் முழுவதும் நெட்ஃப்ளிக்ஸில் வெளியாகிறது.
