பிபிசி நிறுவனத்தின் செல்வாக்கு மிக்க 100 பெண்கள் பட்டியலில் இந்திய பெண்கள் கிரிக்கெட் அணியின் கேப்டன் மித்தாலி ராஜ் இடம் பிடித்துள்ளார். கல்வி, தொழில்துறை, கலை, விளையாட்டு என அனைத்துத் துறைகளிலும் சாதித்த பெண்களை கவுரவிக்கும் விதமாக 2017ஆம் ஆண்டிற்கான செல்வாக்கு மிக்க பெண்களாக 100 பேரை பிபிசி நிறுவனம் தேர்வு செய்துள்ளது. இந்த ஆண்டு நடைபெற்ற பெண்கள் உலகக் கோப்பை கிரிக்கெட் போட்டியில் இந்திய அணி மிகவும் சிறப்பாக விளையாடியது.
கோப்பையைக் கைப்பற்றுவார்கள் என எதிர்பார்த்த நிலையில், இந்திய அணி அதிர்ச்சி தோல்வி அடைந்தது. ஆனாலும் இந்திய வீராங்கனைகளின் சிறப்பான ஆட்டத்தை இந்தியா முழுவதும் பாராட்டியது. இந்திய அணியை வழிநடத்திச் சென்ற கேப்டன் மித்தாலி ராஜை அனைவரும் வெகுவாக பாராட்டினர். இந்த நிலையில் தற்போது பிபிசியின் செல்வாக்கு மிக்க 100 பெண்களின் பட்டியலில் அவர் இடம் பிடித்துள்ளார். முன்னதாக Vogue பத்திரிக்கையின் அட்டைப் படத்திலும் அவர் இடம் பெற்றிருந்தது குறிப்பிடத்தக்கது.
