2.O படத்தின் இசை வெளியீட்டு விழா இன்று இரவு 7 மணிக்கு துபாயில் உள்ள பர்ஜ் பார்க் ஏழு நட்சத்திர ஹோட்டலில் பிரமாண்டமாக நடைபெற இருக்கிறது. இந்த இசை வெளியீட்டு விழாவில் ஏ.ஆர்.ரஹ்மான் லைவ்வாக இசையமைத்து துபாய் நகரத்தையே குலுங்க வைக்கப் போகிறார். இவ்விழாவில் ரஜினியின் எந்திரன் பட ரோபோ காஸ்ட்யூமில் தோன்றி நடமாடிக் கலக்கவிருக்கிறார் தமன்னா. அவருடன் ஏ.ஆர்.ரஹ்மானும் சேர்ந்து பாட்டு பாடியபடியே நடமாடுகிறார்.
ஏ.ஆர்.ரஹ்மானும், தமன்னாவும் எந்திரனில் வரும் ‘இரும்பிலே ஒரு இதயம் முளைத்ததோ…’ பாடலுக்கு ரஜினி அணிந்திருந்த காஸ்ட்யூம்களில் தோன்றி ஆடப் போகிறார்கள். இதுகுறித்த போஸ்டர்கள் வெளியாகி ரசிகர்களிடம் பெரும் வரவேற்பினைப் பெற்றுள்ளன.இந்த நிகழ்ச்சியைக் காண்பதற்காக நடிகர்கள் சூர்யா, அவர் மனைவி ஜோதிகா, தம்பி கார்த்தி ஆகியோர் துபாய்க்கு இரு தினங்களுக்கு முன்பே வந்து தங்கியுள்ளனர். மேலும் பல நட்சத்திரங்களும் துபாய் சென்றுள்ளனர்.
இப்படத்தின் தமிழ், தெலுங்கு மற்றும் இந்தி இசை வெளியீட்டு விழா நிகழ்ச்சிகள் இந்த மேடையில் அரங்கேற உள்ளன. இசை வெளியீடு நடைபெறுவதை யொட்டி துபாய் நகரம் முழுக்கவே 2.0 பட பேனர்கள், விளம்பரங்கள்தான் நிறைந்துள்ளன. துபாயின் மிக உயரமான பர்ஜ் கலிபா கட்டடம் முழுக்க ரஜினி படத்துடன் ஜொலிக்கிறது.
